كان يا ماكان في قديم الزّمان، چان أكو رجّال عجوز فقير يشتغل بقَطع الخيزران، بيوم من الأيّام شاف خيزرانة تلمع بشكل غريب وراح وقطعها ولگا بداخلها شي عجيب جدًا تخيلوا شنو؟
طفلة!
اي اي لگا طفلة صغيرونة حيل حجمها بحجم الإبهام تقريبًا وچانت هالطفلة حيييل حيل حلوة، أخذها العجوز لبيته وصار يعتني بيها هوَّ وزوّجته واعتبروها بنتهم وسمّوها كاغويا - الأميرة المضيئة
وصار العجوز كُل ما يقطع خيزرانة يلگا بداخلها ذهب وصار غني حيييل حيل ما شاء الله :)
كبرت كاغويا وصارت أجمل امرأة بالبلد وذاع صيتها وصار يتقدّم الها كُل الناس، بعدين تقدّم الها خمسة رجال من النبلاء والأمراء، وچان شرطها للزّواج شبه مستحيل، طلبت من كُل واحد خمس أشياء:
•وعاء البوذيّة الحجري من الهند
•فرو حيوان فأر النار الذي لا يحترق
•غصن شجرة جذعها ذهب وثمارها لؤلؤ
•جواهر ملوّنة من عنق التنين
(علىٰ كيفچ يمعودة صدُگ چذب)
المهم أكيد فشلوا كُلهم وأكو بيهم حاول يغش ويصنع أشياء مغشوشة بس هيَّ كشفتهم وأكو استسلم.
إلىٰ أن الإمبراطور نفسه وقع في حُبّها بس همّينة رفضت تتزوّجه بس بقت تتبادل ويّاه الرسائل والأشعار (يمعودة صدُگ چذب) .
بمرور الوقت صارت كاغويا تباوع للقمر وتبچي وسوّتها مناحة، سألوها أهلها ليش هيچ تبچين؟ گالتلهم الحقيقة
"آني مو من أهل الأرض، بالحقيقة آني أميرة من مملكة القمر وصار الوقت حتّىٰ أرجع"
بليلة اكتمال القمر أرسل الإمبراطور جيش كامل حتّىٰ يحميها ويمنعها من الرحيل بس لمّا وصلوا أهل القمر حتّىٰ ياخذوها بمركبتهم أصيب الجنود بأكملهم بالشلل أمام نورهم العظيم!
لبّسوها أهل القمر رداء من ريش يمحي كُل ذكرياتها (ليش يمعودين مو خطيّة صدُگ چذب) حتّىٰ عود تروح بدون ما تحسّ بآلام الفراق.
قبل لا تروح تركت كاغويا رسالة أخيرة للإمبراطور وتركت ويّاها تخيلوا شنو؟ إكسير الخلود.
بس الإمبراطور الرومانسي شگال؟
"شعندي باقي خالد بالحياة إذا بعد ما أشوفها بيها"
ذكرىٰ گالت (فاصل غنائي)
أدري اتفقنا نفترگ
أدري وصلنا للنهاية
صدقني گلبي يحترگ
اعذرني أشگيتك معايا
المهم أمر الإمبراطور رجاله إنّو ياخذون الرسالة والاكسير ويحرگوهن بأعلىٰ قمّة جبل قريبة وچان الجبل منو؟ عفية عليكم جبل فوجي حتىٰ شنو حتىٰ عود يوصل الدخان للأميرة :(
وبقىٰ الإمبراطور منتظرها وما اجتمعوا
وللأسف ما عاشوا عيشة سعيدة.
معلومة إضافية:
يُقال إنَّ اسم الجبل فوجي - Fuji مشتق من كلمة Fushi - 不死 التي تعني لا موت أو الخالد (باللغة اليابنيّة القديمة) وأنَّ الدخان الذي كان يخرج من فوهته قديمًا ما هو إلا أثر احتراق إكسير الحياة الذي رفضه الإمبراطور حزنًا علىٰ فراقها.
جميل
تخبل تخبل ، نيال أحفادچ شلون بيبي حتكون عدهم وتحچيلهم هيچ قصص 😔❣️